【愛懲迷因】：「男朋友唔鍾意我收入高過佢」
(偽) 網友求助：我同男朋友一齊咗五年，我哋兩個都係好搏盡做嘢嘅人，兩年前，我開咗間IG Shop賣手作飾物，近呢一年生意越嚟越好，有幾個月賺得仲多過我份正職收入添！點知......自從男朋友知道咗我每月嘅總收入後，就開始俾說話我聽。
上次去佢屋企食飯前，佢叫我唔好提起IG Shop嘅嘢，我問點解唔講得，佢又唔出聲；又有一次，我哋同一班朋友食飯，有個fd提起我間網店做得幾成功，讚我識做生意，我男朋友當堂黑晒面咁，應咗句「女仔唔使咁叻啦」。我當下好錯愕，覺得佢好似睇我唔起咁。事後，個fd安慰我，佢話男仔接受唔到女朋友叻過自己係好正常，叫我以後喺外人面前俾足面佢……我自問一直都無因為收入高低而唔尊重佢，點解而家好似係我做錯事咁？
(真) Admin 回應：呢個年代，雖然好多人會覺得「男女已經好平等」，但事實上，仲有好多人同你男朋友一樣，性別觀念仍然比較刻板（AKA好父權），覺得男人就係要叻過女人，男主外、女主內等等。令佢產生呢種性別偏見嘅，係父權社會對我哋嘅期望同教育，當男仔唔係社經地位較高嘅一方，仿佛就係佢有問題，要面對外界嘅質疑同嘲諷，所以父權社會壓迫緊嘅絕對唔止係女性。
其實admin認為你並無做錯，發展事業、創業係完全唔關性別事，希望你會堅持做自己想做嘅嘢。而你嘅朋友建議你喺外人面前要維護男朋友嘅「面子」，其實即係暗示緊女仔嘅事業成就大於男性係有問題，所以要向男朋友作出一啲「補償」。與其單方面不停地遷就，不如你試下同佢表達你嘅感受，同埋話俾佢知，唔需要用傳統嘅性別定型去定義自己嘅價值。
為青少年／家長／專業人士提供性暴力及性別平等相關的教育活動，讓參加者認識性別及性暴力等議題。
歡迎預約教育活動、團體參觀或查詢更多教學資源。
