【愛懲迷因】：新年家務誰在做？
呢個禮拜你嘅新年假點過？你屋企有無傾過新年家務分工？年廿八大掃除邊個洗抽油煙機、搬傢俬抹梳化底；年三十晚全世界早收返屋企等開飯時，邊個要趕係街市收爐前買餸煮團年飯？定係好似普遍雙職家庭，年初一你媽媽要招呼親朋戚友、完場後洗碗執屋，老婆／女朋友要主動入廚房洗碗遞菜，費事俾人話無禮貌，然後年初五你地一樣要晨早起身迫巴士地鐵返工。
香港唔少在職女性都背負雙重負擔，意思是日頭要返工，放工又要照顧小朋友、父母、做家務。政府統計處2015年出版《主題性住戶統計調查第56號報告書》，統計發現，女性每天用於照顧家人、做家務、為自己或家人購買貨物或服務的平均時間（2.6小時） 比男性（0.8小時）多。即使女性和男性的工作時數相約，但不論是任何年齡組別，不論是在職、學生、退休等經濟活動身分，女性負責的家務比重都比男性多，有38.5%男性不負責任何家務。
不論性別，家庭成員都應該共同承擔照顧家庭的責任，根據能力和興趣而非社會期許，共同協商家務分工，只要雙方都感覺輕鬆自在，男性可以煮飯湊小朋友，女性都可以換燈膽，旁人亦無權利指指點點。新一年不如就試下多啲溝通、互相尊重，少啲批評？
延伸閱讀：「如果有一份工作要做足廿四小時無假期無休息日，甚至無人工，你會做嗎？」
