【愛懲迷因】：「點解成日都要管女仔點著衫？」
(偽) 網友求助：我同男朋友一齊咗幾年，一直都相處得幾好，估唔到佢會因為著衫問題而發我脾氣。最近我新買咗啲短裙同瑜伽褲諗住有時可以舒舒服服咁出街，點知佢勁介意我著咩衫出街，佢話：「你著咁少想搏人非禮啊？」、「講真你咁著同啲『臭雞』有咩分別？」、「你唔驚俾人偷影Po上網㗎咩？」......講完一大輪之後叫我著返普普通通嘅牛記T恤算啦，但天氣咁熱仲著牛仔褲？點都係著短裙舒服啲啦係咪咁講先……
話口未完，佢又話如果我真係要咁著就唔好再同佢出街，佢話唔想見到啲狗公眼甘甘咁𥄫我咁話喎。吓，著背心同瑜珈褲咋喎，著得舒服啲都唔得？我係咪應該真係聽佢講著返牛記T恤算？
(真) Admin 回應：如果你男朋友真係關心你，佢應該要明白雖然你哋拍緊拖，但你都有拒絕同選擇嘅權利（即係自主權），唔應該以「你咁著就唔好同我出街」嘅說話去情緒勒索同限制你嘅自由。加上現實就係，無論你著牛仔褲T恤定短裙瑜伽褲都有可能會遇到性暴力，例如有人用啲咸咸濕濕嘅目光掃視你、偷影你嘅身材Po上社交媒體、對你評頭品足之類，即使有咁嘅事發生，都係對方嘅問題，根本唔係你嘅錯。同埋你男朋友學埋啲網友用「臭X」嚟羞辱你，其實都係污名化緊你同廣大女性，影響你點睇自己。Admin 認為如果你男朋友講嘅嘢有令你唔舒服，你絕對有權坦白咁同佢講返你嘅感受㗎～
為青少年／家長／專業人士提供性暴力及性別平等相關的教育活動，讓參加者認識性別及性暴力等議題。
歡迎預約教育活動、團體參觀或查詢更多教學資源。
